Tama na ang pagdarasal para umulan
Aug 17, 2007
Nanawagan si Manila Archbishop Gaudencio Cardinal Rosales nitong Huwebes sa mga mananampalataya na ihinto na ang Oratio Imperata Ad Petendam Pluviam o ang pagdarasal para umulan.
(GMANews.TV 08/16/2007) Sa ipinalabas na circular na may petsang Agosto 15, inatasan ni Rosales ang lahat ng parish priests, rectors, chaplains, at school directors sa Archdiocese of Manila na itigil na ang pagdarasal upang humiling ng pagpatak ng ulan.
Ang kautusan ay bunga na rin ng pahayag mula sa Philippine Atmospheric Geophysical Astronomical Services Administration (Pagasa) na tapos na ang tagtuyot na naranasan sa Luzon.
“The rains have come and the Philippine weather agency has pronounced the end to the dry spell. We thank God for this blessing, a sign of His providence and love for us," paliwanag ni Rosales.
Kasalukuyang dumadaan sa Northern Luzon patungo sa Taiwan ang bagyong si Egay kung saan nakataas ang storm signal No. 1 sa Batanes Group of Islands, Babuyan Islands, Cagayan, Isabela, at Catanduanes.
Noong Martes at Miyerkules ay maraming lansangan sa Metro Manila at karatig na lalawigan ang binaha dahil sa patuloy at malakas na pagbagsak ng ulan na dala ng bagyong si Egay.
Bago si Egay, dumaan na rin ang mga bagyong sina Chedeng at Dodong na nagdulot ng matinding pagbaha sa Luzon at sumira sa mga pananim.
Ipinalabas ni Rosales ang circular noong Hulyo 31 kung saan inatasan niya ang mga pari na isama ang kahilingan para sa ulan sa lahat ng misa simula noong Agosto 3.
Sa kabila nito, hinikayat ni Rosales ang lahat na ipagpatuloy ang pagdarasal para maliwanagan ang mamamayan upang pangalagaan ang kalikasan.
“The floods and landslides are not all the result of too much rain, most of these come because of the denudation of our forests, the silting of our rivers, the clogging of our esteros and waterways with non-biodegradable waste, and other harmful practices," paliwanag niya.
Sinabi pa ng cardinal na panahon na para itigil ng tao ang pagwasak sa kalikasan at pangalagaan ang kapaligiran.
“We cannot continue to test God's mercy and kindness with our destructive actions towards nature and the environment He has provided us for our habitat, our home. In this time of gratitude for the rains, let us acknowledge our offenses against our beautiful land and habitat. Let us be truly sorry for them and promise not to commit them again," pahayag ni Rosales.
Tama na ang pagdarasal para umulan